Nado en 1972, exerce como profesor de Matemáticas nun IES de Vigo –cidade na que naceu–, aínda que con raizames chantados na Ribeira Sacra, de onde proceden os seus devanceiros.

A súa paixón pola lectura, tanto en formato novela coma en cómics, fixo que a súa imaxinación rebordase tentando plasmala en creacións literarias que acadarán o recoñecemento en diversos certames literarios. Tal é o caso de O sorriso de Hitler (1º premio no XI Certame Literario de Relato de Aventuras Antón Avilés de Taramancos) que saíu do prelo en 2012, aínda que a súa primeira publicación foi a obra Círculo (1º premio no III Certame de Relato de Muller Matilde Bares), impresa en 2007 individualmente e no 2010 como recompilación baixo o título Póquer de dramas. Así mesmo, aparecen publicacións de relatos da súa autoría en diversas antoloxías de certames nos que foi galardoado, salientando entre eles: Narracións Breves e Poesía do Concello de Ames, Relatos Vigo-Histórico, Narracións Breves Manuel Murguía, Narracións Breves Modesto R. Figueiredo-Pedrón de Ouro, Relatos Curtos Os Viadutos, Narración Curta Ánxel Fole…

A estes galardóns súmase Gumes entre a néboa, que resultou gañadora do VI Concurso Balbino de Relatos, en 2021, e que naceu dos recordos desa xeración que deixaba a cidade para visitar a aldea e saborear eses inesquecibles momentos que quedaron latentes na memoria, entre acontecementos nos que linda o fantástico co real, como un día de mesta néboa na infancia, cerne primixenio deste relato, no que o queixume dun invisible carro na distancia deu lugar ao son que anunciaba unha inquietante chegada…